Stanislavski - vika 1

 Þetta er búin að vera áhugaverð vika. Fyrsti dagurinn fór í fræðslu um nándarþjálfun, hvað hún er og hvenær hún er notuð. Kom kannski helst á óvart hvað þetta nær yfir margt, eins og t.d. efni sem er triggerandi.

Í framhaldi af því byrjaði þriðjudagurinn á að við fórum yfir samskiptareglur, gildi o.fl. í náminu. Síðan var farið í Stanislavsky og Vakhtangov, kennarinn byrjaði á smá fyrirlestri og svo var farið út á gólf í alls kyns æfingar og stuð.

Miðvikudagurinn fór í umræður um vinnu leikstjórans og hvernig við skilgreindum hana hvert og eitt.

Fimmtudagurinn var tileinkaður biomechanics og fór í alls kyns líkamlegar æfingar sem tóku verulega á. 

Föstudagurinn fór í alls kyns æfingar sem gengu út á líkamlega tjáningu, m.a. að stilla okkur upp eins og málverk og búa til sögu um uppstillinguna sem hin áttu að giska á.

Þetta er semsagt fyrsta vika af sex á námskeiði sem er kennt við Stanislavski og er að stórum hluta kennsla í leiktækni en endar á því að við leikstýrum stuttri senu.

Welcome Week

 

 Nýnemavikan fór í alls kyns fræðslu og viðburði. Bæði hagnýt atriði um skólann sjálfan og þjónustu við nemendur en líka hluti sem munu örugglega gagnast í framtíðinni. Við erum meðal annars búin að fá fræðslu um ómeðvitaða fordóma og jafnrétti, fjölbreytni og inngildingu sem er ágætis áminning um hluti sem þarf að passa sig á, bæði í náminu og líka þegar komið er út í bransann. Við fengum líka workshop með Rikki Beadle Blair, starfandi leikstjóra sem fór yfir sínar vinnuaðferðir og hluti sem geta komið upp, t.d. varðandi erfið samskipti og svo gerðum við nokkrar æfingar sem hann notar, bæði í upphitun og til að hjálpa leikurum ef eitthvað gengur treglega. Já og svo fóru allir mastersnemarnir í nokkurs konar óvissuferð einn daginn þar sem okkur var skipt í hópa sem fengu hver sína tilvitnun og fóru inn í London, hópurinn minn fór á Tate Modern, til að finna eitthvað sem minnti á tilvitnunina og vinna stutt atriði. Í lok dags hittust svo allir hóparnir fyrir framan National Theatre og sýndu atriðin. Í gærkvöldi sá ég svo útskriftarsýningu hjá konu á leikstjórnarbrautinni, held að leikararnir hafi líka verið úr skólanum.

Myndin er úr tímanum með Rikki Beadle Blair

Mættur á svæðið

 

Jæja, þetta er bara að bresta á eftir alls kyns bras við að redda hinu og þessu. Það fyrsta sem þurfti að gera þegar samþykki fyrir skólavist var komið var að uppfylla fyrirvara, sumt var einfalt eins og að skila inn gögnum en svo þurfti ég að taka enskupróf sem var smá bras en mér tókst þó að græja það í gegnum netið og náði því auðveldlega. Þegar síðan endanlegt samþykki lá fyrir kom að því að sækja um dvalarleyfi og borga sig inn í sjúkratryggingakerfið.

Það var komið fram í júlí þegar allt þetta var klárt og þá tók við leit að húsnæði. Það kom fljótt í ljós að það yrði of dýrt að leigja íbúð, bæði er leigan há hér í Bretlandi og svo hefði maður þurft að kaupa húsgögn o.þ.h. þannig að ég endaði á að leigja herbergi nálægt skólanum og flutti ég inn í það í gær eftir viðburðaríka ferð til Englands sem tafðist úr hófi vegna bilana. Hinir leigjendurnir eru í sama skóla og ég og eins og við var að búast er ég lang elstur í húsinu.

Fyrstu tveir dagarnir hafa svo bara farið í að koma sér fyrir, klára skráningu í skólanum, stofna bankareikning og á morgun er svo stefnan tekin í leikhús, nema hvað. 

Myndina tók ég fyrir framan aðalbyggingu skólans með nýja aðgangskortið mitt.

Leikstjóri fæðist

Nú styttist í að undirritaður hefji nám í leikstjórn við East 15 í Bretlandi. En af hverju leikstjórn og af hverju núna? Ég hef lengi haft áhuga á því að vinna við leikhús og þegar ég byrjaði í menntaskóla gekk ég strax í leikfélagið þar og tók svo seinna þátt í Stúdentaleikhúsinu á háskólaárunum. Ég reyndi meira að segja að komast inn í leiklistarskólann en það gekk ekki svo ég endaði í ensku við HÍ. Eftir háskólann datt ég út úr leiklistarstarfi en áhuginn fór samt aldrei alveg og svo fór að fyrir nokkrum árum fann ég að ég yrði að koma mér af stað aftur, skellti mér á leiklistarnámskeið hjá Leiklistarskóla LA og leikstjórnarnámskeið í Leiklistarskóla BÍL. Já og svo gekk ég meira að segja í Freyvangsleikhúsið og lék þar og leikstýrði. Eftir því sem leið á fann ég að leikstjórn var eitthvað sem mig langaði að kynnast meira og dýpra og ég fann að það togaði í mig að fara í leikstjórnarnám þannig að úr varð að ég sótti um í East 15 síðasta vor og viti menn, ég komst inn og er á leiðnni út í lok mánaðarins. Hvort að maður endi svo sem starfandi leikstjóri verður bara að koma í ljós en fyrst er að klára námið. Myndin sem fylgir færslunni er svo úr Leiklistarskóla BÍL þar sem ég tók námskeiðið Leikstjórn IV nú í sumar þar sem við skiptumst við á um að leikstýra hvert öðru á þessu litla sviði.